Kryetari i Partisë Demokratike, Lulzim Basha ka përfunduar fjalimin e tij nga selia e PD-së, ku ka deklaruar se beteja e tyre do të vazhdojë, deri në largimin e kryeministrit Rama nga pushteti, krijimin e një qeverie transitore dhe zhvillimin e zgjedhjeve të lira dhe të ndershme.
Në fjalën e tij, Basha tha se kjo është një mbrëmje e rëndësishme, teksa nuk la pa përmendur dhe vendimin e presidentit Meta për anulimin e datës së zgjedhjeve vendore, për të cilën tha se “dështoi me turp zgjedhja komuniste”.
“Unë e di zemërimin e zemrave që dhembin nga fëmijët e pabukë, prindërit e pabukë. Nga qindra dhe mijëra të shpronësuar nga krimi. E prek çdo dite dhimbjen tuaj, ndaj do të jemi deri në fitore të kësaj beteje. Ne nuk do të hedhim asnjë hap pas, deri në realizimin e objektivit tonë. Ne duam zgjedhje standarde evropiane. Ne sot duam të zhbëjmë apo të ndalim trajektoren e ngjarjes që sapo ka nisur. Dështoi me turp zgjedhja komuniste, pas vendimit të presidentit për 30 qershorin. Orët e ardhshme duhet të na gjejnë më të vendosur si asnjëherë më parë për ta çuar këtë betejë drejt fitores. Tik -taku të lëvizjes popullore për liri dhe demokraci po dëgjohet dhe do të dëgjohet më parë.
Ndaj dua t’ju pyes a jeni gati ta vazhdojmë këtë betejë të gjithë? A jeni gati të bëni gjithçka për orët e demokracisë evropiane?
Njeriu nuk është asgjë nëse nuk është vlera për të cilën beson. Ju jeni vlera, çlirimtarët e Shqipërisë nga krimi. Kur njerëzit bëhen bashkë për kauzën e vërtete nuk ka forcë që i ndal, nuk ka forcë që i mund”, deklaroi Basha.
Ndër të tjera, lideri demokrat përshëndeti dhe simpatizantët socialistë që i janë bashkuar protestës së ditës së sotme, ndërsa u bëri thirrje të gjithë atyre që sipas tij kanë ushtruar dhunë dhe kanë arrestuar protestues të pafajshëm, se do të mbajnë përgjegjësi: “Lulzim Basha nuk harron, do mbani përgjegjësi për akte dhune kundër protestuesve paqësorë.”
