Presidenti i Kosovës Hashim Thaçi, pas akuzave të ashpra të ngritura ndaj tij, ende nuk ka bërë një prononcim publik, mirëpo së fundmi, me një veprim, i tha të gjitha.
Gjatë një kontrolli të thjeshtë në rrjetet sociale, lehtësisht vihet re se Thaçi ka përditësuar fotografinë e tij të kopertinës në Facebook.
Fotoja e re që Presidenti ka vënë është pikërisht ajo e Ushtrisë Çlirimtare të Kosovës (UÇK), si për t’iu thënë të gjithëve që: “kjo është përgjigja e vetme që kam dhe… lufta e UÇK flet vetë”.
Fotoja në fjalë ka marrë mijëra komente.
“Asnjë gjykatë në këtë botë nuk mund ta njollosë dhe ta mohojë luftën e drejtë dhe të pastërt të UÇK-së”, shkruan një komentues.
“Përgjigja më e mirë. E vetmja përgjigje duhet të jetë edhe gjatë procesit gjyqësor, asnjë fjalë më shumë, çdo përgjigje duhet bërë vetëm me tri shkronja, UÇK”, shkruan një tjetër.
Të shumtë në numër kanë qenë edhe personazhet publikë, të cilët në shenjë solidarizimi me situatën aktuale, kanë shpërndarë shenjën dalluese të Ushtrisë Çlirimtare të Kosovës në rrjetet sociale.
Rikujtojmë se ditën e djeshme, Zyra e Prokurorit të Specializuar ka dorëzuar një aktakuzë ndaj Presidentit të Kosovës Hashim Thaçi dhe Kreut të PDK-së, Kadri Veseli.
Në aktakuzën që Zyra e Prokurorit të Specializuar i paraqiti për shqyrtim Dhomave të Specializuara për Kosovën, Hashim Thaçi, Kadri Veseli dhe disa persona të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje të paligjshme, zhdukje me detyrim të personave, përndjekje dhe tortura. /TIRANA TODAY
