Kryeministri Edi Rama, ka vendosur që të marrë mandatin e deputetit për qarkun e Durrësit dhe jo atë të Vlorës. Ai e ka konfirmuar këtë nëpërmjet letrës zyrtare drejtuar Komisionerit shtetëror të Zgjedhjeve, Ilirjan Celibashit.
Kreu i qeverisë, kandidoi dhe fitoi mandatin e deputetit në të dyja qarqet në zgjedhjet parlamentare të 25 prillit, por duhet të zgjidhte vetëm njërin qark për të përfaqësuar.
Me këtë vendim, Rama lë bosh vendin e tij në Vlorë pas 8 vitesh, për vajzën çame Teuta Ramaj, e cila renditej e 9 në listën shumemërore të kandidatëve të PS për qarkun jugor.
Gjatë fushatës elektorale Rama kishte paralajmëruar se po të fitonte në të dyja qarqet, do të zgjidhte mandatin në Durrës, pasi sipas tij, i kishte një borxh të madh këtij qyteti.
Më herët gjatë ditës së sotme, kryetarja e LSI Monika Kryemadhi, ka pranuar mandatin e deputetes në Fier, ku kryesonte listën më 25 prill, duke “djegur” Kejdi Mehmetajn që ishte renditur e dyta në këtë qark, ndërsa i ka lënë mandatin e Tiranës Petrit Vasilit.
