Epidemiologu Ilir Alimehmeti, në një lidhje ‘Skype’ në ‘Wake Up’ në Top Channel, sqaroi udhëzimin më të fundit nga ekspertët e shëndetit, i cili thekson se një person me Covid-19 nuk infekton pas një periudhe të caktuar.
Qendra Evropiane për Kontrollin e Sëmundjeve, si autoriteti më i lartë, ka publikuar udhëzimin e ri që është një dokument që tregon se sa ditë duhet të rrijë në izolim një person asimptomatik, një pacient që shfaq simptoma të lehta e mesatare. E deri tek ata që përjetojnë simptoma të rënda dhe që kërkojnë trajtim spitalor.
“Ky është një dokument shumë i rëndësishëm, është një guidë teknike e datës 16 tetor nga ECDC, e cila në fakt i thjeshton gjërat.
Kështu që nuk ka asnjë vështirësi për ta përfshirë në strategjitë e çdo shteti. Madje edhe në shtetet si Shqipëria, me më pak mundësi se shtetet e tjera, sepse i thjeshton.
I thjeshton për shembull duke mos kërkuar një tampon për negativizim në momentin që personi ka qenë komplet asiptomatik, dhe thotë mbas 10 ditësh ky person mund të dalë nga izolimi.
I thjeshton duke thënë se rastet e lehta deri në të moderuara dhe kjo patjetër është edhe vendim pak i mjekut, për të përcaktuar nëse është rast i lehtë apo i moderuar. Sërish thotë se pas 10 ditësh mund të dalësh pa tampon, ose mund të bësh edhe dy tamponë nëse ke mundësi. Të dyja janë në rregull. Tani kuptohet qartë se personi nuk është me infeksion pas një periudhe të caktuar”, sqaroi mjeku.
