Mbyllet derbi mes Tiranës dhe Partizanit. Pjesa e parë nisi mirë për Tiranën që ka shumë raste për shënim me Cale dhe Hasanin, por nga ana tjetër, Partizani është shumë cinik, dy goditje në portë dhe dy gola. Cordeiro dhe Solomon me kokë ndëshkojnë Tiranën.
Kampionët në fuqi të Kategorisë Superiore nuk njohin kundërshtarë, të paktën në kryeqytet, pasi nuk humbin një derbi kundër Tiranës prej 18 takimesh. Golat e Cordeiro e Solomon vendosën fatet e takimit, me Partizanin që ia arriti të fitojë me shifrat e ngushta 2-1 përballë Tiranës.
Në pjesën e dytë Tirana provon të reagojë me Hasanin që rihap ndeshjen, por në fund është sërish Partizani që del fitues nga derbi, dhe në këtë mënyrë kryeqyteti mbetet sërish i kuq pasi Tirana nuk thyen dot sërish mallkimin.
