Zbardhet dëshmia e Aldo Vyshkajt, taksistit që u mbajt peng për disa orë, e ku për pasojë autorët i morën me dhunë edhe 2 mijë euro, para këto që i kishte me vete. Ngjarja ka ndodhur në një lokal në fshatin Katund i Ri, në Elbasan.
Sipas “BalkanWeb”, Vyshka ka deklaruar para oficerëve të policisë se këto para i kishte për të paguar shkollën e vajzës.
“2.000€ që kisha me vete, ishin paratë që do paguaja shkollën e vajzës. Më mbajti peng pronari i lokalit, Thanas Bejko, deri në orën 02:00 të mëngjesit”, tha Vyshka.
Pas mesnatës, taksisti Vyshka ka gjetur mundësinë për të sinjalizuar uniformat blu, të cilët arritën në vendngjarje dhe arrestuan përgjegjësin e lokalit dhe shokun e tij për “vjedhje me dhunë”, dhe “heqje të paligjshme të lirisë”. Po kështu në pranga kanë rënë edhe dy kamerierët e lokalit, për “deklaratë të rreme” e “veprime që pengojnë zbulimin e së vërtetës”.
