Në kuadër të masave për të parandaluar përhapjen e koronavirusit, qeveria shqiptare ka vendosur që deri në datën 3 prill të mbyllen të gjitha baret, restorantet dhe lokalet në të gjithë vendin.
Urdhri në fjalë është firmosur nga Ministrja e Shëndetësisë, Ogerta Manastirliu. Bëhet me dije se subjektet që nuk do i binden urdhrit, do të gjobiten.
Ministria e Shëndetësisë ka dhënë urdhër të prerë që të ndalohen një sërë aktivitetesh biznesi në mbarë vendin. Këto masa janë ndërmarrë për përballimin me pandeminë e koronavirusit.
Në Shqipëri janë identifikuar 33 të prekur. Një prej të prekurve, ndërroi jetë në Spitalin e Durrësit dhe vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier.
“Lufta” me koronavirusin po zhvillohet anembanë botës. 7 vendet me të industrializuara të botës, do të zhvillojnë një takim të jashtëzakonshëm me anë të një video konference, për të diskutuar rreth situatës së shkaktuar nga koronavirusi.
Presidenti francez Emmanuel Macron, tha se pas një bisede telefonike me presidentin amerikan Donald Trump, u vendos për takimin e të gjithë udhëheqësve të G7.
Ai deklaroi se video konferenca do të bëhet të hënën, me qëllimin për përpjekjen për krijimin e një vaksine kundër Covid-19.
Bilanci negativ i viktimave nga koronavirusi në Itali ka arritur kulmin në këto 24 orët e fundit.
