Organizata Botërore e Shëndetësisë ka reaguar pas akuzave se nuk dha paralajmërimin e duhur, për kërcënimin që paraqiste koronavirusi.
Me këtë arsyetim u nis edhe presidenti Trump, i cili njoftoi të martën se do të pezullonte fondet e SHBA që mbështesin operacionet e kësaj organizate.
Ndërkohë drejtuesit e OBSH i janë kundërvënë këtyre akuzave, duke thënë se organizata e ka paralajmëruar botën që më datë 5 janar.
“Ideja që duhet të hidhemi në mbrojtje në këto momente është disi e çuditshme. Në javët e para të janarit, OBSH u shpreh shumë, shumë qartë. Ne paralajmëruam botën më 5 janar. Institucionet në mbarë botën, përfshirë Shtetet e Bashkuara filluan më 6 janar të aktivizojnë sistemet e menaxhimit ndaj situatave të parapritura. Në javët që pasuan kemi dhënë informacione të vazhdueshme me të rejat e fundit, përfshirë të dhëna për qeveritë, si dhe për shkencëtarët në skaje të ndryshme të globit. Virusi u identifikua më 7 janar. Sekuenca na erdhi më 12 janar”, tha drejtori i Programeve të Emergjencave të OBSH, Michael Ryan.
Sipas tij, ky paralajmërim duhet të ishte pasuar nga masa mbrojtëse dhe përgatitore në vendet individuale. Ai shton se paralajmërimi bënte të qartë nevojën për rezerva me aparatura spitalore, përfshirë aspiratorë.
“Kur OBSH nxori udhëzimet, e bëri tepër të qartë se duheshin marrë masa për një kërcënim që godet sistemin e frymëmarrjes. Laboratorët duhet të kishin reaguar me masat e nevojshme, me marrjen e mostrave që kjo sëmundje të mos përhapej nga një person tek tjetri”, thotë zyrtari i OBSH.
Nga ana tjetër, drejtori i Përgjithshëm i OBSH-së, Tedros Adhanom Ghebreyesus tha se kjo ishte një periudhë e vështirë, por theksoi se organizata do të vazhdonte t’u qëndronte në krah vendeve që përballen me këtë krizë:
“Ne do të vazhdojmë të punojmë me çdo partner për t’u shërbyer popujve në botë me një angazhim të patundur ndaj shkencës dhe në solidaritet. Deri tani tre vaksina janë në prova klinike. Mbi 70 të tjera janë në procesin e zhvillimit. Po punojmë me partnerë për të përshpejtuar procesin e zhvillimit, prodhimit dhe shpërndarjes”, tha ai.
