Pas deklaratës së kryeministrit grek, Kyriakos Mitsotakis, i cili u shpreh kundër hapjes së negociatave për Shqipërinë në BE, vjen edhe hapi i radhës së kryeministrit Edi Rama.
Mësohet se kryeministri Rama dhe homologu i tij grek, do të zhvillojnë takimin e tyre të parë gjatë Asamblesë së Përgjithshme të OKB-së, më 24-27 shtator, në New York.
Sipas mediave greke, Mitsotakis pritet të takohet me Ramën, në një takim detajet e të cilit akoma nuk janë mbyllur apo konfirmuar nga zëdhënësi qeveritar, Stelios Petsas, por që konsiderohet i sigurt.
Takimi i kryeministrave të dy vendeve fqinje pritet me interes të madh, për ecurinë e negociatave dhe marrëdhënieve bilaterale, pas deklaratave të fundit të Mitsotakis për rolin e ri të Greqisë si fuqi stabilizuese dhe progresive, por nga ana tjetër për pengesën e integrimit të Shqipërisë në BE, nëse nuk respektohen të drejtat e minoritetit etnik grek në vend, i vetmi minoritet i njohur zyrtarisht, çështje ku qeveria e re greke nuk pritet të jetë aspak toleruese.
