Gazetari Artan Hoxha, teksa ishte i ftuar në studion e Report tv, tha se presidenti Ilir Meta duhet të japë llogari për incidentet dhe konfliktin civil që paralajmëroi kur anuloi zgjedhjet.
Ai tha se asgjë nuk ndodhi, ndonëse ishte paralajmëruar për situatë të agravuar. Ndodhur në këto kushte, Artan Hoxha kishte kërkuar informacione nga ana e kreut të shtetit.
“Dekreti që çdekretoi 30 qershorin, në argumentimin që bëri presidenti, një nga arsyet kryesore ishte fakti se presidenti për shkak të pozicionit që ka, thoshte se justifikohej nga situata që ndodhet vendi, duke thënë se kishte informacione se do kishte përplasje dhe luftë.
Sot ai ka një detyrim të thotë se ku i ka marrë këto informacione. Policia është përpjekur që në të gjitha bashkitë me probleme, të shoqërojë personat me probleme. Presidenti deklaroi se nëse 30 qershori do të ndodhte si ditë votimesh apo zgjedhje, do shkonte në konflikt civil.
Kjo gjë nuk ndodhi. Pamë disa incidente përpara në Kavajë, Shkodër, Dibër, po në ditë që ishte lajmëruar se do të ndodhte gjithë kjo katrahurë, nuk ndodhi asgjë. Jo më kot kërkova që presidenti të na japë shpjegim çfarë informacionesh kishte”, tha Artan Hoxha.
