Banorët e zonës së Kombinatit, Paskuqanit, “5 Majit” dhe Laprakës kanë paralajmëruar se do të futen në grevë urie, nëse nuk kontaktohen për t’u sqaruar dhe për të marrë kontratat e nevojshme për dëmshpërblim.
Sakaq, disa banorë të tjerë paralajmëruan se nëse nuk do të zbatohej Kushtetuta, ata do të vinin në përdorim ligjet e Kanunit, duke u betuar se do të mbronin me gjak pronat e tyre që janë planifikuar të prishen.
Për zonën e “5 Majit”, data 22 është konsideruar si dita kur në zonë do të zhvillohet aksioni i radhës nga ana e IMT-së, për shembjen e banesave, ndërkohë që banorët kërkojnë dëmshpërblim me çmimin e tregut, ose përfitim të të njëjtave metra katrorë që kanë pasur në pronësi. Kryeministri Rama premtoi se askush nuk do të nxirrej nga banesa pa asnjë zgjidhje, duke shtuar se të gjithë përfitojnë dëmshpërblim dhe bonus qeraje.
Pak ditë më parë, nga foltorja e Kuvendit, ish-Kryeministri Sali Berisha doli në mbështetje të banorëve të “5 Majit” në Tiranë, të cilët protestojnë për shembjen e banesave të tyre. Berisha tha se në atë zonë ishin planifikuar për t’u ndërtuar objekte 7-katëshe, por projekti ka ndryshuar për t’u bërë 35-katëshe. Për këtë, Berisha akuzoi kryeministrin Edi Rama dhe kryetarin e PD Lulzim Basha.
