Ish-ministri i Drejtësisë Ylli Manjani e quan propagandë paralajmërimin e kryeministrit Edi Rama për ligjin special kundër grupit KÇK (kap ça të kapësh).
I ftuar këtë të shtunë në emisionin “Kjo javë”, Manjani u shpreh se ka ligje plot me anë të të cilave mund të zhvillohet lufta anti-korrupsion. Ndërsa shtoi se kryeministri nuk ka punë me luftimin e korrupsionit, pasi është votuar për të qeverisur dhe jo për të bërë drejtësinë.
“Është një formule mediatike, propagandistike, që hajde të themi ca fjalë të mëdha, se mos e merr vesh populli se çfarë ligji po bën. Unë po iu them një gjë fare të thjeshtë. Çfarë e pengon sot shtetin shqiptar, Prokurorinë shqiptare të luftojë KÇK-në.
Ligje ka sa të duash, nuk ka nevojë për ligje të reja. Ka ligje sa të duash, pa fund. Atëherë çfarë po bën Rama. Rama po fajëson diçka abstrakte. Gjëja më e thjeshtë që bëhet në politikën shqiptare është se thuhet “e ka fajin ligji”.
Kjo është më e thjeshta, sepse ligji nuk flet i shkreti, ku di ligji të flasë. Ligji si ta shkruash, ashtu e bën. Kur shkojnë ta zbatojnë, e zbatojnë si sytë e vet, edhe pastaj thotë e ka fajin ligji prapë. Vjen tjetri thotë ligji, s’bën ky ligj, do bëj ligj tjetër.
E dyta unë prapë pyes çfarë pune ka kryeministri me këtë punë? Kryeministri është votuar për të qeverisur, nuk është votuar për të futur njerëz në burg, as për të nxjerrë njerëz nga burgu, as për të bërë drejtësinë, madje as për të luftuar korrupsionin në doni ju. Nuk ka punë fare”, deklaroi Manjani.
