Vllaznia është rikthyer me fitore në elitë falë supergolit të shënuar nga braziliani Hygor Guimaraes Goncalves. Pas këtij trepikëshi të marrë, nuk kanë munguar urimet edhe nga Engin Firat. Ndërkohë drejtori sportiv ka bërë një postim në rrjetin social Facebook, ku nuk ka nguruar që të thumbojë publikisht të gjithë kritikët që kanë vënë në dyshim projektin e klubit.
Postimi i plotë i tij: “Urime për fitoren e Vllaznisë. Do të dëshiroja të jepja disa informacione për tifozët. Laçi luan prej shumë vitesh bashkë, ata kanë luajtur këtë verë në Kupën e Evropës dhe kanë 9 javë që stërviten e janë në maksimum fizikisht. Ndaj, kjo ndeshje ishte shumë e vështirë dhe e rëndësishme. Vllaznia u detyrua të përballonte probleme të pabesueshme për shkak të politikës. Këto probleme vazhdojnë edhe tani. Në këtë situatë të vështirë, askush, e përsëris askush, nuk e ndihmoi klubin. As me 1 lek. Suad Lici u desh të organizonte financat personalisht. Normalisht, në këtë situatë është e pamundur që të ndërtosh një skuadër.
Ndaj, e filluan shumë vonë me stërvitjen. Kjo skuadër u stërvit vetëm për 4 javë dhe nuk mund të jetë në kushte të mira fizike. Shumë lojtarë të rinj u desh të përshtateshin, 3 brazilianë erdhën këtë javë. Si i quajtën brazilianët pa i parë asnjëherë? ‘Turistë’, ‘invalidë’, ‘amatorë’ dhe, dhe… me 2 stërvitje Hygor luajti dhe shënoi një gol ‘amator’.
Ju kujtohet viti i kaluar kur morëm Silvio Xhunior. Disa ekspertë thanë se ai nuk kishte shënuar asnjëherë në jetën e tij. Skandal! Ai u bë golashënuesi më i mirë, pastaj të njëjtët ekspertë thanë se si ne e lejuam të largohej. Për shkakun se ai shënoi kaq shumë gola, mori një ofertë të mirë. Kaq e thjeshtë. Pasi ne nuk mund të paguajmë rrogat që janë paguar 2 vite më parë! Kjo skuadër është ndërtuar me një buxhet shumë më të ulët sesa 2 vite më parë. Kushdo që e njeh futbollin vetëm pak, e di që kjo skuadër ka nevojë për 3-4 javë që të jetë në të vërtetë e gati fizikisht dhe të përshtaten njëri me tjetrin.
Lojtarë si Ramadani, Maranao, Emerson dhe një mbrojtës i majtë, do të bëhen pjesë e kësaj skuadre gjithashtu. Unë shpresoj që të gjithë tifozët e Vllaznisë do ta mbështetin këtë skuadër gjatë gjithë kohës. Atëherë me siguri Vllaznia nuk do të kalojë më periudhën e vështirë të viteve të fundit. Nëse e keni ndjekur ndeshjen, do të kuptonit këtë: Sherri, Gurishta, Zogaj, Krymi, Kruja, Shtubina, Lika, Ruqi, Fikaj… 9 lojtarë nga Shkodra luajtën sot… Cila skuadër tjetër në Evropë mund të luajë me 9 lojtarë nga qyteti i lindjes? Tifozë të Vllaznisë, ky është realiteti! Kjo skuadër ka nevojë për mbështetjen tuaj!”
