Dëmët e shkaktuara nga COVID-19 janë kolosale. Shumë shtete janë gjunjëzuar para virusit vdekjeprurës, ku fatmirësisht gjatë orëve të fundit është vënë re një trend në rënie e numrit të të vdekurve, e po ashtu edhe të infektuarve.
Por pas SHBA-së, një sërë shtetesh i janë shtuar listës, duke e vënë me ‘shpatulla pas murit’ Kinën. Përpos Britanisë së Madhe, Francës e SHBA-së, tashmë edhe Gjermania hedh akuza mbi Kinën, si fajtore për përhapjen e COVID-19.
Por Gjermania nuk është ndalur me kaq, pasi i ka kërkuar Kinës një shifër të majme si dëmshpërblim për dëmet e shkaktuara nga COVID-19. Bëhet fjalë për plot 150 miliardë euro. Lajmi në fjalë është përcjellë nga tabloidi britanik “Express”. E ndërsa
kërkesa për këtë shifër ka ardhur nga prestigjiozja gjermane “BILD”, e cila është përfshirë në një ‘luftë të ftohtë’ me Kinën.
“BILD”, në një artikull me titullin “Ajo që Kina na ka borxh”, ka hartuar një faturë se çfarë duhet të paguajë Kina. Lista përfshin një tarifë prej 27 miliardë eurosh për të ardhurat e humbura të turizmit, deri në 7.2 miliardë euro për industrinë gjermane të filmit, një milion euro në orë për kompaninë ajrore gjermane Lufthansa dhe 50 miliardë euro për bizneset e vogla gjermane. Kjo kërkesë është lënë në hije nga ana e Kinës. Kina i është përgjigjur këtij artikulli, duke u shprehur se “nxit ksenofobinë dhe nacionalizmin”.
