Prej ditësh, ministrja Manastirliu nënvizon se janë marrë masat për përballimin e pandemisë, dhe se do të veprohet sipas skenarëve të këshilluar nga ekspertët. Pavarësisht se opozita e përgënjeshtron këtë gjë, duke thënë se situata është kaotike, Manastirliu ka pohuar se janë forcuar kapacitetet për të përballuar situatën vjeshtë-dimër.
Ministrja e Shëndetësisë, Ogerta Manastirliu, ka zhvilluar ditën e sotme një takim me kreun e OBSH për Europën, Hans Kluge. Pas takimit me dyer të mbyllura, të dy palët dolën në një konferencë për mediat.
Manastirliu deklaroi se deri më tani janë në dispozicion 1600 shtretër, përfshirë këtu edhe spitalet rajonale sipas 3 skenarëve. Mes tyre u firmos dhe një marrëveshje e cila është një angazhim konkret për mbështetjen që OBSH do të ketë për Shqipërinë.
“Strategjia e përballimit të vjeshtë-dimrit, të përgatitur nga ekspertët tanë dhe të mbështetur nga ekspertët e OBSH, janë udhërrëfyes të rëndësishëm për të adresuar të gjitha nevojat në përgjigje të situatës së epidemisë, për të forcuar kapacitetet e sistemit ton shëndetësor edhe gjatë kësaj faze.
Pa harruar asnjë moment se detyra jona është të kujdesemi për ata që kanë nevojë, kujdes shëndetësor. Ne nuk kemi lënë askënd pas.
Po forcojmë kapacitetet dhe të përballojmë situatat që mund të vijnë gjatë vjeshtë-dimrit. Kemi rritur kapacitetet e testimit dhe gjurmimit me 4 herë, kemi rritur kapacitetet spitalore me 500 shtretër.
Ndërkohë që kemi 3 skenarë të përfshirjes së spitaleve rajonalë, që e çojnë këtë kapacitet në 1600 shtretër dhe duke vijuar me trajnimin e ekipeve mjekësore”, tha Manastirliu.
