Luftimet dhe sulmet ajrore në provincën e fundit që mbahet nga rebelët e Sirisë, kanë shkaktuar dëmtime të mëdha, të dukshme këto që nga hapësira.
Në imazhet satelitore nga 20 Maji deri më 26 Maj, shihen qartë pamjet para sulmit dhe ato pas sulmit.
Ngritja e operacioneve ushtarake në provincën veriperëndimore të Idlib po krijon një “fatkeqësi humanitare”, pavarësisht nga përpjekjet e organizatave ndërkombëtare për të ofruar ndihmë, paralajmëroi të martën OKB.
Në javët e fundit, dhuna ka çuar në vdekjen e 160 civilëve, zhvendosjen e 270,000 banorëve dhe në sulme drejt institucioneve shëndetësore, shkollave dhe tregjeve, tha Ursula Mueller, Ndihmës Sekretare e Përgjithshme për Çështjet Humanitare në Këshillin e Sigurimit të OKB.
“Çështja sot është që çfarë do të bëni për të mbrojtur civilët në Idlib, shembulli më i fundit i një fatkeqësie humanitare tërësisht të njohur, të parashikueshme dhe të parandalueshme, që shpaloset para syve tanë”, u shpreh Mueller.
Një panoramë satelitore e qytetit sirian të Kafr Nabudah e ditës së shtunë tregon ndërtesa të dëmtuara dhe të shkatërruara.
Të martën, katër sulme ajrore që synonin qytetet dhe fshatrat në pjesën jugperëndimore të Idlibit vranë 13 vetë, duke përfshirë shtatë fëmijë. Sipas një grupi lokal shpëtimi vullnetar, të njohur si Helmetë e Bardhë, e cila njihet edhe si Mbrojtja Civile e Sirisë, së paku 51 vetë janë plagosur si pasojë e këtij sulmi.
Ndërsa Observatori Sirian për të Drejtat e Njeriut (SOHR) shprehet se 149 sulme ajrore goditën disa qytete dhe fshatra në fshat Idlib të martën, të cilat vranë dhe plagosën dhjetëra.
