Ish-kapiteni i Kombëtares që është tërhequr nga kuqezinjtë, Mërgim Mavraj, për fat të keq ka pësuar një dëmtim gjatë sfidës së javës së dytë, të kategorisë së dytë të futbollit gjerman AUE-Grojter Furt, 1-1.
Sikundër shihen qartë nga pamjet, mbrojtësi i Grojter Furtit është lënduar pas një përplasje aksidentale me portierin e skuadrës së tij. Portieri Sasha Burshert, në minutën e 17-të të sfidës me AUE-n, pas një krosimi nga lojtarët e AUE-s në zonën e Grojter Furtit, doli nga zona e tij për të spastruar topin, por nuk mundi të shmangte kontaktin me Mavrajn duke e goditur në kokë.
Menjëherë stafi mjekësor ka ndërhyrë për t’i dhënë ndihmë ish-kapitenit të Shqipërisë, ndërsa mediat gjermane raportojnë se Mavraj ka humbur ndjenjat për një moment.
Fatmirësisht gjendja e tij shëndetësore është e stabilizuar.
