Mijëra qytetarë do të kalojnë edhe një tjetër natë rrugëve. Pala greke në pikën kufitare të Kakavijës, ka mbyllur punën. Pak minuta pas orës 22:00, ora zyrtare kur edhe mbyllet turni për doganën e shtetit fqinj, gjithçka ka ndaluar në Kakavijë.
Si rregull, në orën 06:00 pala greke duhet të rinisë punën, por ende nuk ka një përgjigje për këtë. Radha e emigrantëve shqiptarë që duan të udhëtojnë drejt Greqisë përmes doganës së Kakavijës, arrin deri në disa kilometra.
Shkak për këtë është bërë vendimi i shpallur disa ditë më parë nga pala greke, se pas 16 gushtit, çdo shtetas që do të hyjë në territorin e tyre duhet të këtë të kryer testin e Covid-19 brenda 72 orëve, si dhe duhet të karantinohet atje për 7 ditë.
