Aleatët e Partisë Demokratike shprehen me rezerva sa i përket bashkëpunimit PD-LSI. Kryetari i LZHK-së, Dashamir Shehi i ftuar në studion e Report TV, është shprehur se kjo aleancë ka nisur si objektiv kundër qeverisjes së Edi Ramës.
Ai tha se kjo nismë e përbashkët mes dy partive, duhet të jetë e përkohshme, me pretendimin se LSI nuk ka asnjë interes të përbashkët me Partinë Demokratike dhe në përfaqësimin e të djathtës. Lideri i LZHK-së shkon më tej duke thënë se kjo qasje është në dorën e PD dhe logjikon vetë se si duhet vendosur për këtë.
“Kemi dhënë gjykimin tonë, që aleanca është me ne, ne që hymë në zgjedhje si opozitar. Janë të mirëpritur në këtë aleancë të re kundër Ramës edhe LSI-së. Madje jo vetëm LSI, por edhe të tjerë. Mirëpo strategjia e bllokut opozitar kalon përtej një aleance të përkohshme. PD ka një mision që është historik, rivendosja e shtetit shqiptar, lufta kundër korrupsionit, rikthimi i të djathtës në pushtet, këto janë tezat afatgjata. LSI nuk përputhet me tezat e të djathtës dhe të PD-së. Mund ta ndihmojë, por kjo është afatgjatë për PD-në. Është në dorë të PD që ta gjykojë pozicionin e vet”- shprehet Shehi.
Sa i përket bashkëpunimit mes PD-LSI-së, Shehi e sheh më tepër si një grupim, që ka vetëm një interes dhe ky sipas tij, është rrëzimi i Edi Ramës.
“Unë gjykoj, por edhe kolegë të tjerë, se PD dhe LSI janë dy bashkësi që priten, ka edhe një delta-zonë, dhe kjo është interesi për të rrëzuar Edi Ramën. Vetëm kjo është. PD nuk ka thjesht detyrë të zëvendësojë apo alternojë pushtetin, që të ikë Rama dhe të vijë Basha, s’është kjo detyra e PD, është shumë më e madhe. Ne e gjykojmë si një forcë e cila mund të kontribuojë për rrëzimin e Ramës, por jo për objektiva të tjera. Ndarja e pushtetit është e dorës së dytë, por PD ka një mision historik të qendrës së djathtë, ndërsa LSI nuk ka ndonjë rol këtu”- u shpreh Shehi.
