Shoqatat e gazetarëve që kanë kundërshtuar publikisht pr/ligjin për median online, janë thirrur sot në Komisionin Parlamentar të Medias, për të paraqitur zyrtarisht ankesat e tyre. Gazetari Ylli Rakipi iu është drejtuar me një thirrje të hapur deputetëve, që të mos e miratojnë këtë ligj. Sipas tij, ky ligj i shkon përshtat vetëm një njeriu, “liderit suprem” Edi Rama. Ai tha se paketa Anti-Shpifje është iniciativë e Ramës, ndërsa i drejtohet mediave me një gjuhë poshtëruese.
“Paketa anitishpifje është iniciativë personale e kryeministrit, mospëlqimi i tij për mediat online është i njohur publikisht. I drejtohet mediave me një gjuhë poshtëruese. Lideri ynë ka të drejtë të thotë çfarë të dojë”, u shpreh Rakipi.
“Jam dëshmitar i dy gjyqeve të kryeministrit tonë. Kërkonte të më dënonte për agjitacion e propagandë… imagjinoni çfarë mund të bëjë ai me katër veta tek Këshilli i Ankesave të AMA-s”, shtoi ai.
“Nuk ka asnjë garanci se këto dy institucione shtetërore AMA dhe AKEP do veprojnë në pavarësi nga politika. Ne jemi njerëzit që tregojmë publikisht se çfarë ndodh këtu. Ne shohim se ka mbetur një kryetar shteti i vetëm përballë këtij regjimi. Ka dalë jashtë sistemit opozita, e cila nuk e dimë sot se ku është dhe sa vendime ka marrë në interesa të veta. Ndaj, nëse mundeni ju (deputetët) kaloni në krahun e medias.
Turp i madh për këtë vend me gjithë këtë tragjedi (tërmeti), të bëhet një ligj për ti mbyllur gojën medias. Ky është një ligj fashist. Nuk është i nevojshëm ky ligj. Qytetarët apo zyrtarët që kanë pretendime ndaj një media të caktuar, mund ti drejtohen gjykatës. Nuk mund të zëvendësohen vendimet e gjykatave me vendimet e dy institucioneve në pronësi të qeverisë”, deklaroi Rakipi.
Paketa në fjalë e cila synon të vendosë rregulla në mediat online, është pritur negativisht nga gazetarët dhe organizatat që mbrojnë fjalën e lirë.
Nga ana tjetër, shoqëria civile kërkon nga qeveria dhe Kuvendi, të kthehen pas dy projekt-ligjet për paketën Anti-Shpifje.
