Kryeministri Rama ka dhënë një mesazh ndaj të gjithë kundërshtarëve të televizionit të tij ERTV. Opozita i quan lajmet e pasqyruara në ERTV një show mediatik të kryeministrit, e ndërsa ai ka kërkuar që mos ti prekin fjalën e lirë.
Po kështu Rama ka reaguar edhe për polemikat që ka ndezur ligji i paketës anti-shpifje për mediat. Kryeministri sqaron se projekt-ligji është konsultuar e përpunuar prej një viti me OSBE-në, dhe do të hyjë në seancë pa asnjë cen në aspektin e standarteve të lirisë.
Shoqëria civile, shoqatat e mediave, dhe opozita e kanë kundërshtuar këtë ligj, duke e cilësuar si një formë që qeveria ka zgjedhur për të mbyllur zërin e mediave që janë kritike ndaj qeverisë.
Statusi
“Ose s’e kanë lexuar projekt-ligjin, ose duan të prekin lirisht dinjitetin e çdokujt nëpër portale e faqe sociale dhe të tallen me të vërtetën e me opinionin publik, duke shkruar çfarë t’u teket, duke shpifur sa e si t’u teket, duke shantazhuar e duke i vënë gjoba kujt t’u teket!
Projekt-ligji është konsultuar e përpunuar prej një viti, nen për nen e pikë për pikë me OSBE dhe do të hyjë në seancë pa asnjë cen në aspektin e standarteve të lirisë për t’u shprehur e të së drejtës për t’u informuar pa kufizim, po edhe të mundësisë për t’u mbrojtur nga shpifjet.
Sa për “ERTV”, faleminderit për publicitetin dhe mos ma prekni ju lutem fjalën time të drejtëpërdrejtë, për të gjithë ata që hyjnë pa asnjë detyrim në faqen time të fejsbukut, ku po u pëlqeu rrinë po s’u pëlqeu ikin”, përfundon Rama.
Ose s’e kanë lexuar projekt-ligjin ose duan të prekin lirisht dinjitetin e çdokujt nëpër portale e faqe sociale dhe të tallen me të vërtetën e me opinionin publik, duke shkruar çfarë t’u teket, duke shpifur sa e si t’u teket, duke shantazhuar e duke i vënë gjoba kujt t’u teket! pic.twitter.com/pHVqHjQy8w
— Edi Rama (@ediramaal) December 16, 2019
