Ambasada Gjermane në Tiranë ka reaguar lidhur me protestën e radhës të opozitës së bashkuar, e cila është lajmëruar se do të mbahet sot në orën 20:00.
Ambasada u ka bërë thirrje qytetarëve që do të marrin pjesë në tubim që të respektojnë ligjet në fuqi, ndërsa palëve politike që të heqin dorë nga sulmet dhe të mbajnë përgjegjësi për vendin.
“Liria e tubimeve dhe e drejta për të demonstruar paqësisht janë kolonat e çdo demokracie. Ndërsa dhuna e çdo lloj forme është e papranueshme! Duke patur parasysh demonstratën e njoftuar për mbrëmjen e sotme u bëj thirrje të gjithë pjesëmarrësve të respektojnë ligjet në fuqi.
Prej organizatorëve pres të angazhohen me të gjitha mundësitë për një zhvillim paqësor të protestës si dhe të jenë në lartësinë e përgjegjësisë së tyre përmes apelit publik për protesta paqësore. Me shqetësim të madh jam duke ndjekur ditët e fundit edhe trazirat e dhunshme në vende të ndryshme të Shqipërisë. Një gjë është e qartë: mësymjet e dhunshme nuk janë mjete legjitime të përballjes politike.
U bëj thirrje me forcë të gjitha palëve të heqin dorë edhe nga sulmet verbale e të marrin përsipër përgjegjësitë e tyre për vendin.”
