Sër Alex Ferguson është detyruar të shkojë në spital me urgjencë pasi ka pësuar një hemorragji cerebrale dhe gjendja e tij ka qenë kritike për jetën. Një ambulancë u thërrit me urgjencë në shtëpinë e Ferguson në Ceschire, rreth orës 21:00 dhe skocezi u dërgua në spitalin e Macclesfield. Më pas, me ndihmën e një tjetër ambulance dhe eskortës së policisë, Ferguson u çua në spitalin Salford Royal.
Shumë njerëz, përfshin edhe ish-futbollistë të Manchester United kanë kërkuar informacione për gjendjen e Ferguson dhe kjo e ka detyrua klubin e “djajve” të lëshojë një komunikatë për shtyp. Në të shkruhej: “Operacioni ka shkuar shumë mirë, por Ferguson do të qëndrojë në terapi intensive për të vazhduar kurën. Familja e tij kërkon respektimin e privacisë në këto momente.”
Kujtojmë që gjendja e tij shëndetësore ka qenë mjaft e mirë pasi vetëm pak ditë më parë u pa në fushë për të nderuar Arsen Wenger me një titull personal në ndeshjen Manchester United-Arsenal. Ferguson konsiderohet si flamuri i Manchester United dhe trajneri më i madh i historisë në Premier League ku 76-vjeçari ka fituar 38 trofe në 26 sezone me “djajtë”. Ai u tërhoq në maj 2013, pasi fitoi për herë të 13-të titullin kampion në Angli.
