Ditën e djeshme u identifikua viktima e parë nga 39 trupat e pajetë që u gjetën brenda një kamioni në Britaninë e Madhe. Ajo është Pham Thi Tra My, një 26-vjeçare vietnameze. Mediat kanë publikuar mesazhet e fundit që ajo i ka dërguar nënës së saj.
“Mami më vjen keq. Udhëtimi im nuk përfundoi me sukses. Jam duke vdekur, pasi nuk marr dot frymë”, i shkruante 26-vjeçarja të ëmës. Koha e mesazheve korrespondon me kohën kur kamioni ishte në udhëtim.
Familjarët e viktimës treguan për mediat vendase se ajo ofroi 34 mijë euro për të ikur në Angli, “në kërkim të një jete më të mirë”.
Sipas autoriteteve britanike, dyshohet se mes 31 burrave dhe 8 grave që u gjetën të ngrirë në kamionin frigorifer, janë edhe 19 vietnamezë të tjerë.
Sakaq, policia ka arrestuar 4 persona si të përfshirë në ngjarje, ndërsa vijon ekspertiza për identifikimin e viktimave.
