Prokuroria e Tiranës ka nisur një proces verifikimi, pas publikimit të të dhënave të pagave për punonjësit në të gjithë vendin. Grupet e hetimit po përqendrohen në institucionet që administrojnë të dhënat.
Besart Kadia, zëvendës ministri i Financave, e ka konsideruar çështje kriminale publikimin e pagave. Teksa ka qenë i ftuar në “Opinion”, Kadia zbuloi se qeveria shqiptare po ndihmohet nga shtete të tjera më të avancuara në teknologji, dhe po heton për të zbuluar autorin që i ka publikuar këto të dhëna.
“Duke qenë se është çështje serioze, duhet ta kuptojmë është çështje kriminale. Janë mijëra punonjës tatimesh që kanë akses çdo ditë tek këto të dhëna. Punonjësit e tatimeve kanë akses dhe janë të dhëna shtetërore për të parë sa punohet.
Tani kemi një akt kriminal të një individi. Këto janë të dhëna zyrtare që kanë akses punonjësit e tatimeve. Janë marrë në forma të ndryshme dhe janë bërë publike ato që kanë dashur.
Nuk janë të dhënat që përpunohen nga shteti. Tani debati nëse ndodhin apo nuk ndodhin ngjarje të tilla. Ky është një akt që Ministria e Financave e ka çuar në Prokurori për t’u ndjekur më tej.
Shtetet që janë shumë të avancuar në teknologji, janë në këto çaste duke u marrë për të parë këtë çështje. Janë me qindra sulme që u ndodhin shteteve të ndryshme sot, nga shumë aktor”.
