Teksa presidenti Meta tha se është i gatshëm të rishikojë datën e dekretuar nga vetë ai për zgjedhjet lokale të 30 qershorit, misioni i OSBE- ODIHR pohon se së shpejti në Shqipëri do të jenë 18 vëzhgues afatgjatë, dhe 250 vëzhgues afatshkurtër. Audrey Glover, drejtuese e misionit të OSBE-ODIHR në Tiranë, tha se zbatimi i ligjeve është shumë i rëndësishëm dhe varet nga vullneti politik.
“Së shpejti do kemi edhe 18 vëzhgues afatgjatë për zgjedhjet, dhe ata do vendosen në grupe dyshe për të vëzhguar zgjedhjet në të gjithë vendin. Shpresojmë të kemi edhe 250 vëzhgues afatshkurtër. Nëse kemi ndonjë përfaqësues këtu nga ambasada, doja ti inkurajoja se afati i fundit i aplikimit për vëzhgues është 10 ditë nga sot.
Vëzhguesit afatshkurtër do vëzhgojnë ditën e zotimit si dhe procesin e numërimit. Për ditën e zgjedhjeve me ne do jetë edhe një delegacion nga Kongresi i Këshillit të Europës. Ne kemi ardhur këtu pa ndonjë agjendë të fiksuar, ne jemi këtu për të vëzhguar zgjedhjet, si të gjitha shtetet pjesëmarrëse të OSBE janë angazhuar për t’i vëzhguar së bashku zgjedhjet, dhe ne do lemë faktet të flasin.
Fushat të cilave do u kushtojmë vëmendje të veçantë janë puna e organeve të regjistrimit të zgjedhjeve, në të njëjtën linjë do shohim sa janë zbatuar rekomandimet e OSBE-ODIHR për zgjedhjet, do shohim edhe pjesëmarrjen e grave, regjistrimin e votuesve dhe të kandidatëve, median, financimin e fushatave zgjedhore, dhe mënyrën se si zgjidhen ankesat dhe apelimet.
Siç e kemi thënë shumë herë, zbatimi i ligjeve është shumë i rëndësishëm dhe varet nga vullneti politik. Misioni do dalë me një raport të ndërmjetëm para zgjedhjeve, do ketë gjithashtu një konferencë ditën pas zgjedhjeve për përfundimet paraprake. Raporti përfundimtar do publikohet rreth 8 javë pas procesit zgjedhor”.
