“Detyrat e Policisë së Shtetit gjatë Proceseve Zgjedhore”, të përmbledhura në një broshurë, u prezantuan sot gjatë një takimi të krerëve të Policisë së Shtetit dhe Prezencës së OSBE-së në Shqipëri.
Në takimin informues për masat që policia ka marrë gjatë fushatës zgjedhore, morën pjesë Zv.ministrja e Brendshme, Rovena Voda dhe Drejtori i Përgjithshëm i Policisë, Haki Çako të cilët falenderuan Prezencën e OSBE-së për mbështetjen e dhënë përgjatë viteve, sidomos gjatë proceseve zgjedhore, si një partner solid dhe një mik kritik.
Ndërsa zv/kryetari OSBE-së, Robert Wilton, e siguroi Policinë e Shtetit për mbështetjen dhe asistencën e mëtejshme të OSBE-së, ndërsa nënvizoi rolin e Zyrës së OSBE-së për Institucione Demokratike dhe Të Drejtat e Njeriut (ODIHR) në vëzhgimin e këtyre zgjedhjeve. Në fund, ai iu tha pjesëmarrësve se iu takon qytetarëve dhe politikanëve shqiptarë të vendosin nëse këto zgjedhje do të jenë të lira dhe të ndershme.
Botimi i “Detyrat e Policisë së Shtetit gjatë Proceseve Zgjedhore” u financua nga Prezenca e OSBE-së në Tiranë.
