Ish-deputetja e PD, Albana Vokshi, është vënë në mbrojtje të koleges së saj Oriola Pampuri, e cila tha sot se një protestues ka vdekur. Kjo shkaktoi reagime të menjëhershme, por Pampuri krijoi më tej një situatë kaotike, duke folur për një tjetër realitet.
Nga Spitali i Traumës, ku kishte shkuar për të vizituar të lënduarit, Vokshi justifikoi deklaratën shokuese të koleges së saj. Ajo tha se qëndrimi i saj publik kishte ardhur pas informacioneve, se një person kishte ardhur pa ndjenja. Ndaj dhe informacioni mori një tjetër drejtim, duke shkaktuar kaos.
Pampuri e shpalli të vdekur LIVE, protestuesi fotografohet shëndoshë e mirë
“Kolegia ime u shpreh nga informacionet që i kanë dhënë. Ishte një person i shtrirë, i dhunuar. Mbi të është ushtruar dhunë nga policia. Në momentin e parë ka ardhur këtu pa ndjenja, prandaj u dha informacioni kështu”, u shpreh ajo në mbrojtje të ish-deputetes.
Ish-deputetja Vokshi, tha se opozita do të qëndrojë deri në fund pranë banorëve. “Ka banorë që u ka dalë kavilja, u janë thyer dhëmbët për shkak të dhunës që ka ushtruar polici. Ka zonja që kanë pësuar djegie të gradës së lartë. Por unë nuk di ku ndodhen, dhe askush nuk na jep informacion. Ka dhjetra të arrestuar që janë dhunuar në mënyrë ç’njerëzore nga policia. Çdo gjë mbahet në një terr informativ. Urdhri nga Rama është që asgjë të mos jetë transparente.
Kjo babëzi e Edi Ramës, nuk duhet të ketë minimalisht viktima njerëzore. Do vijojmë deri në fund betejën. Jemi me banorët e Unazës. Ajo ç’ka kryetari i PD-së, Luzim Basha i ka premtuar është që jo vetëm do jemi pranë tyre në çdo moment, por me të ardhur në pushtet do i shpërblejë këta banorë”, u shpreh Vokshi.
