Opozita i ka dërguar një kërkesë kreut të Kuvendit, Gramoz Ruçi, ku i kërkon largimin e Taulant Ballës nga Delegacioni Parlamentar i Stabilizim Asociimit. Duke iu referuar kërkesës në fjalë, opozita ka shprehur këtë shqetësim, pasi sipas tyre, Balla shoqërohet me trafikantë droge, dhe mbron përdhunues me pushtet.
Duket se opozita tashmë e ka kthyer në kryefjalë të ditës, e të njëjtat akuza përçohen sërish.
Në letrën dërguar Ruçit, anëtarët e opozitës në Delegacion, Genc Pollo, Albana Vokshi, Klajda Gjosha, Jorida Tabaku dhe Oerd Bylykbashi kërkuan zëvendësimin e Ballës me një tjetër socialist, pa lidhje kriminale.
“Opozita e konsideron të papërshtatshëm dhe kundërproduktiv për interesat europiane të Shqipërisë, që Taulant Balla të jetë pjesë e Delegacionit Parlamentar dhe bashkëkryesues i Komisionit të Përbashkët të Asociim Stabilizimit me Bashkimin Europian”, thuhet në një njoftim të PD.
Anëtarët e opozitës argumentojnë se Shqipëria nuk mund të përfaqësohet në bisedimet me Brukselin në mbledhjen e 15 Tetorit me një politikan që ka pranuar publikisht se ka mik familjar një të dënuar të rrezikshëm për “trafik ndërkombëtar droge”, pasuria e të cilit është shumëfishuar pas miqësisë me Taulant Ballën.
