Përfaqësuesit e opozitës në Këshillin Politik për Reformën Zgjedhore i janë drejtuar me një letër deputetëve, Damian Gjiknuri dhe Rudina Hajdari lidhur me vazhdimësinë e procesit.
Ata kërkojnë që mbledhjet e Këshillit të rifillojnë duke nisur që nga dita e diel në orën 11:00.
Kujtojmë se puna e këshillit për Reformën Zgjedhore u ndërpre për shkak të pandemisë së koronavirusit.
Në nisje të procesit ishte parashikuar që ky Këshill të dilte me një draft në mes të muajit Mars i cili do të votohej më pas në Kuvend. Aty pritet të adresohen të gjitha rekomandimet e OSBE/ODIHR për Reformën Zgjedhore.
“Konfirmimin për të zhvilluar mbledhjen vijuese të Grupit të Punës së Këshillit Politik, ditën e diel, datë 10.05.2020, ora 11:00 ose ditën e hënë, datë 11.05.2020 ora 10:00, me këtë rend dite:
1.Riskedulimin e kalendarit të punës së Këshillit Politik, duke synuar përmbylljen e punës brenda datës 31 Maj 2020.
2.Vlerësimin e përfaqësuesve të mazhorancës mbi propozimet e deritanishme të opozitës të bëra në mbledhjet paraardhëse të Këshillit Politik.
3.Çështje të tjera të propozuara nga anëtarët e tjerë të Këshillit Politik”, shkruhet ndër të tjera në letrën e përfaqësuesve të opozitës.
