Nënkryetari i PD, Edmond Spaho, ka deklaruar se demokratët do përdorin çdo mjet për të mos lejuar mbajtjen e zgjedhjeve fasadë në 30 qershor. Në këtë formë, ai paralajmëron intensifikim të protestave pas tubimit të 13 prillit.
“Zgjedhje në qershor nuk ka për të pasur. Fakti që po zhvillojmë protesta qytetare, tregon se të gjitha format e mundshme, në varësi të zhvillimeve politike mund të merren në konsideratë”, ka thënë ai në një intervistë për A2 CNN.
Spaho i kërkon edhe faktorit ndërkombëtar të parandalojë përshkallëzimin e situatës. “Duhet të parandalojë përshkallëzimin e situatës dhe përsëritjen e skenarëve, të cilët asnjeri nuk ka dëshirë të shfaqen”, thotë më tej ai.
Edhe nënkryetari i LSI, Petrit Vasili, tha në studion e “Dita Jonë” e A2 CNN se opozita nuk po kërkon pushtet, por respektimin e dy të drejtave themelore, lirinë e votës dhe të fjalës.
“Të dy liritë janë tundur, duhet të rithemelojmë sistemin. Nuk kanë rëndësi fituesit, fituesit gjithmonë do të jenë relativë”, deklaroi Vasili.
