Ministri i Brendshëm, Sandër Lleshaj, ka reaguar për operacionin antidrogë, ku mes të arrestuarve ishin edhe dy punonjës policie. Ata akuzohen për përfshirje në veprimtari kriminale.
Lleshaj thotë se uniformat blu nuk do të ndalen për të çuar deri në fund misionin e tyre, dhe se para ligjit do të dalin të gjithë abuzuesit.
Ministri i mëshon faktit se policia është jo vetëm imazhi i drejtuesve të saj, por edhe i vetë shoqërisë.
Njoftimi
Policia e Shtetit, SHÇBA dhe Prokuroria finalizuan sot një operacion të rëndësishëm, në sajë të të cilit, krahas të tjerëve, u arrestuan edhe dy punonjës policie për përfshirje në veprimtari kriminale.
Procesi i ndarjes së Policisë nga ata që nuk e meritojnë nderin e të shërbyerit në radhët e saj do të vijojë me rigorozitet të plotë.
Policia është jo vetëm imazhi i drejtuesve të saj, por edhe i vetë shoqërisë. Si e tillë ajo duhet dhe do të jetë larg kujtdo që nuk i shërben me nder dhe angazhim interesit publik.
Përgëzime për këtë operacion të suksesshëm për Policinë, SHÇBA dhe Prokurorinë!
