Kryebashkiaku i Lushnjes, Fatos Tushe dhe 10 bashkëpunëtorë të tij janë arrestuar ditën e sotme nga SPAK, pasi janë përfshirë në një tender abuziv prej 24 milion lekësh për rehabilitimin e kanalit ujitës.
Një prej të arrestuarve, Bujar Murati i cili është administratori i “Euro Alb”, është prangosur edhe në vitin 2009 për abuzim me tenderat publikë, në kuadër të operacionit ‘Prokurimi i fundit”.
Sipas hetimeve në vitin 2009 për zbardhjen e aferave korruptive që po kryheshin me tenderin prej 125 mijë eurosh të uniformave të policisë, i arrestuar ishte edhe Bujar Murati, asokohe drejtor i Përgjithshëm i Zhvillimit të Procedurave të Përqendruara të Prokurimit pranë Ministrisë së Brendshme.
Sipas prokurorisë, katër biznesmenë të kompanive të ndryshme i kanë paguar shuma të majme Muratit, duke u paracaktuar fitues në tenderin për uniformat.
Ndërkohë, sot ai u arrestua si administrator i “Euro Alb”, i cili përfitonte fonde publike. Kjo kompani ka qenë e vetme në garë dhe ky investim do të kryhej në fshatin Bitaj.
