Gjatë ditëve të fundit është shtuar frika, pas përhapjes së variantit Omicron në disa vende. E pranishme në qendrën e vaksinimit në stadiumin “Air Albania”, Ministrja e Shëndetësisë dhe Mbrojtjes Sociale, Ogerta Manastirliu apeloi sërish ndaj qytetarëve që të vaksinohen. Ministrja tha s’ka nevojë për panik, por gatishmëri të shtuar për të mirë menaxhuar situatën me pandeminë. “Është e rëndësishme të vijojmë vaksinimin edhe në raport me variantin e ri Omicron, që tashmë ka shqetësuar botën. Jo duke i vendosur vendet në panik, por i ka vendosur në një gatishmëri të shtuar të gjitha vendet, ashtu sikurse edhe ne”, tha Manastirliu.
Duke folur për variantin e ri Omicron, Manastirliu tha se ISHP do të dërgojë mostrat për analizim, për të parë më pas nëse ky variant ka qarkulluar apo po qarkullon në vendin tonë.
“Instituti i Shëndetit Publik është duke punuar për të përgatitur mostrat sipas protokolleve të ECDC, për t’i çuar për t’i analizuar dhe për të vijuar më tej sekuencimin e këtyre mostrave.
Për të bërë dhe ne të gjithë atë hartëzimin e nevojshëm, për të vlerësuar nëse varianti Omicron qarkullon në vendin tonë dhe sigurisht ajo çfarë është më e rëndësishme është që të rrisim vigjilencën”, tha Manastirliu.
Sa i takon masave anti-covid, Manastirliu bëri me dije se janë duke bërë një vlerësim të imtësishëm të gjitha masave aktuale në luftën kundër Covid 19.
“Ne jemi duke bërë një vlerësim të imtësishëm të gjitha masave aktuale që ne kemi në luftën kundër Covid-19, duke filluar nga masat ekzistuese të qarkullimit, patjetër të distancimit, të vendosjes së maskave në ambientet e brendshme”.
“Janë elemente shumë të rëndësishëm të cilët duhet të vazhdojnë që të zbatohen nga të gjithë qytetarët, pasi kjo është një betejë e cila fitohet vetëm nëse qytetarët dhe autoritetet janë së bashku në zbatimin e këtyre masave të thjeshta. Sigurisht duke vijuar me rritjen e mbulesës vaksinale dhe me vaksinimin qoftë me dozat e para, qoftë me duke u vaksinuar plotësisht për të mos vonuar vaksinën apo dozën e dytë dhe qoftë për të bërë vaksinën përforcuese apo dozën e tretë”, tha Manastirliu.
