Organizata Botërore e Shëndetësisë bën me dije se për herë të parë pas disa javësh, Evropa ka regjistruar rritje të rasteve javore me koronavirus.
OBSH paralajmëron se nëse nuk bëhet asgjë për të ndaluar përhapjen, një pjesë e vendeve do të kenë sërish rritje të rasteve.
Drejtori rajonal i OBSH-së për Evropën, Hans Kluge, tha se 30 vende evropiane kanë regjistruar rritje të rasteve me koronavirus, gjatë dy javëve të fundit.
“Në 11 nga këto vende, përhapja e përshpejtuar ka çuar në një rishfaqje shumë domethënëse që nëse lihet e pakontrolluar mund t’i shtyjë sistemet shëndetësore në kaos edhe një herë në Evropë”, tha ai në një konferencë për mediat.
Shteti gjerman i North Rhine-Westphalia ka vendosur sërish karantinën në dy rrethe pas “një shpërthimi epidemik” në një fabrikë përpunimi të mishit, ndërsa në provincën verilindore të Spanjës e Aragon po vendosen sërish kufizime për shkak të një rritje të rasteve në mes të mbledhësve të frutave.
