I dërguari i posaçëm i OBSH, David Nabarro është shprehur se derisa të gjendet një vaksinë, koronavirusi do vijojë të jetë “një kërcënim i vazhdueshëm” për botën.
Në një intervistë për Sky News, Nabarro theksoi se njerëzve në mbarë botën do t’i duhet të mësohen të bashkëjetojnë me këtë sëmundje.
Sipas tij, Organizata Botërore e Shëndetit beson se një vaksinë do të jetë e disponueshme minimumi pas “një viti e gjysmë, deri në dy vite e gjysmë”. Eksperti shtoi se rregullat për distancimin fizik dhe masat mbrojtëse do të duhet të ndiqen për një kohë shumë të gjatë.
Por kjo nuk do të thotë se jeta duhet të ndalet, sqaroi ai. Nabarro tha se ekzistojnë edhe viruse të tjera që janë kërcënime të vazhdueshme, duke shtuar se HIV, virusi që shkakton SIDA-n, i ka detyruar njerëzit të ndryshojnë sjelljen e tyre.
Nabarro tha se çelësi për t’u marrë me koronavirusin do të ishte zvogëlimi i rasteve të infeksioneve me anë të testeve, gjurmimit dhe procedurave të kontaktit.
“Duhet perceptuar drejt shëndeti publik, që do të thotë të jesh në gjendje të mbrohesh kundër këtij virusi duke qenë në gjendje të gjesh shpejt njerëzit me sëmundjen, duke përdorur teste, dhe pastaj t’i izolosh ata dhe vetëm më pas ekonomia do të jetë në gjendje të vazhdojë”, tha ai.
