Në prill të këtij viti, emisioni “BOOM” në RTV Ora investigoi dhe transmetoi pamje të një aksidenti automobilistik në qytetin e Divjakës, si pasojë e të cilit humbi jetën 6- vjeçari, Avram Bashuri.
Edhe pse në vendin ku u shkaktua aksidenti shpejtësia e lejuar ishte 20 km në orë, ky fakt nuk u mor parasysh nga Prokurori i çështjes Dritan Marku, ndërkohë që në pamjet filmike u pa qartë qartë shpejtësia e madhe e mjetit në momentin që ka përplasur për vdekje djalin 6-vjeçar.
35-vjeçarja, e cila shkaktoi këtë aksident, u la e lirë nga Gjykata. Mbrëmjen e sotme “BOOM” solli fakte të reja lidhur me aksidentin tragjik. Ditën e aksidentit, shumë pranë vendngjarjes ka qenë zonja Jeta Torribo. Ajo rrëfen ekskluzivisht për “BOOM” të gjithë skenën e aksidentit.
Jeta Torribo: Po bëja një xhiro pasdite. Isha pak më andej kur shoh një makinë, shoh dhe djalin. Nuk e di nëse ishte brenda vijës së bardhë, por në mes të rrugës nuk ishte. Makina e ngriti nga përpara saqë e priti kur ra dhe pastaj e hodhi atje. Një çikë më andej ndaloi zonja e makinës, vuri duart në kokë. U kthye pastaj, i ra nga mbrapa makinës dhe doli dhe mori djalin. Pashë djalin kur i ra dora dhe nuk do ta harroj deri sa të vdes atë skenë. Ajo ulëriti: O bo bo çfarë bëra! Djali ra në trotuar, unë u preva komplet dhe nuk kisha fuqi. Ia kam shpjeguar dhe policisë. Djalit i ra dora kur e kishte ajo në krah. Kishte një celular në dorë dhe mbajti krahun. Ishte dhe një burrë, erdhën dhe nja 2-3 të tjerë nga këtej mbrapa.Pastaj ikën. Kjo ka qenë e vërteta këtu. Kur ndodhi përplasja djali ra në kofano dhe ajo vazhdoi dhe pak, pastaj ndaloi. Doli nga makina me shpejtësi. Unë pranoj të dëshmoj, nëse kanë dyshime të marrin ekspertë se ku jam ndodhur unë.
Shpejtësia e lejuar në vendin e ndodhjes se aksidentit ka qenë 20 km në orë pasi kjo konsiderohet zonë e banuar. Edhe me këtë tabelë kufizimi shpejtësie aksidenti tragjik nuk mundi të parandalohej.
Ndërkohë që sot Bashkia e Divjakës ka vendosur një tjetër tabelë, ku shpejtësia e lejuar është 50 km në orë.
Vendosja e kësaj tabelë shumë pranë vijave të bardha është burim aksidenti.
Emisioni “BOOM” do të vijojë ta ndjekë këtë çështje, në mënyrë që këto tabela të mos u kushtojnë jetën edhe personave të tjerë.
