Mes pankartave të shumta që protestuesit e opozitës mbajnë në duar para Kryeministrisë, është edhe një pankartë ku në gjermanisht falenderojnë gazetarin gjerman Peter Tiede.
Në pankartë shkruhet: “Faleminderit Peter Tiede. Ti je heroi ynë”.
Ky i fundit pak ditë më parë publikoi 10 përgjime të tjera telefonike të realizuara nga Prokuroria shqiptare nga Dosja 184/2016, lidhur me zgjedhjet vendore në Dibër, ku dëgjohen politikanë socialistë, dhe ish-ministra të qeverisë Rama, që diskutojnë për rezultate maksimale të votimeve.
Ashtu sikurse në përgjimet lidhur me dosjen 339, edhe në materialet audio të publikuara nga “Bild”, flitet sërish për një skemë të organizuar nga Partia Socialiste, kësaj radhe për të siguruar fitoren në zgjedhjet lokale të vitit 2016-të në Dibër.
Bisedat zhvilloheshin mes ish-ministrit të Energjisë dhe të Infrastrukturës, Damian Gjiknuri, ish-ministrit të Brendshëm, Saimir Tahiri, deputetët e Partisë Socialiste Ulsi Manja dhe Xhemal Qefalia, zyrtarëve të lartë socialistë, drejtuesit të Policisë Bashkiake në Dibër, Robert Aga dhe personave të identifikuar si të lidhur me krimin.
