Nuk kanë të ndalur përplasjet mes Këshillit Bashkiak në Vlorë dhe kreut të Bashkisë. Kryetari i Bashkisë së Vlorës, Dritan Leli, ka reaguar sërish pas përplasjeve të tij me anëtarët e Këshillit Bashkiak.
Këshilli Bashkiak ka kërkuar që mbledhja të zhvillohet nesër në datë 30 qershor, në ambientet e teatrit ‘Petro Marko’, por Dritan Leli propozoi që të mblidhen më 29 qershor në aplikacionin Zoom.
Leli thotë se ka të pamundur që të jetë në mbledhjen që do të zhvillohet nësër, kjo për shkak të agjendës së paracaktuar më parë. Në postimin e tij të radhës në Facebook, ai sqaron arsyet përse e kishte vendosur sot mbledhjen me Këshillin Bashkiak.
Leli thotë se kjo demonstron një situatë jo normale, dhe jashtë funksionit të Këshillit të Bashkisë. Tejet i drejtëpërdrejtë, kreu i Bashkisë Vlorë shton më tej se nuk e ka kuptuar arsyen e këmbënguljes së vazhdueshme për të krijuar një situatë kaotike të tillë, kur gjithçka ka funksionuar online.
Në mbledhjet e shkuara, Dritan Leli nuk ka qenë prezent, me argumentin se po respekton masat anti-COVID, ndonëse Ministria e Shëndetësisë ka dhënë ‘OK’ që të mbahen mbledhje fizikisht.
Statusi
I kisha kërkuar Këshillit Bashkiak që ta zhvillonim sot mbledhjen e radhës, atë që u pezullua po prej këshillit, megjithëse e planifikuar prej tij, dhe u shty pa rënë dakord, për në datën 30. 06. 2021.
E gjithë kjo, shpalos një situatë jo normale dhe jashtë funksionit të këshillit të bashkisë, megjithatë, për shkak të një agjende të programuar kohë më parë, nuk e kam të mundur të jem pjesë, siç i njoftova!
Do doja të isha i pranishëm, duke i qëndruar të gjitha pikave që kërkohen, siç do doja që kjo mbledhje të ishte zhvilluar më parë, në datën e paracaktuar, për të mos zvarritur jo vetëm nevojat ekonomike të familjeve e fëmijëve në nevojë, por edhe për të proceduar me pompat e ujit që ndërkohë mund të ishin blerë dhe komunitet e Vlorës, Nartës e Zvërnecit, t’iu ishin afruar zgjidhjeve që kërkojnë.
Personalisht, nuk e kam kuptuar ende arsyen e këmbënguljes së vazhdueshme për të krijuar mizanskena në teatër, kur gjithçka ka funksionuar më së miri, siç të gjithë e dini, online.
Forma mund të jetë e rëndësishme për të krijuar karaktere e realitete imagjinare, por në atë që ne bëjmë dhe duam të arrijmë, vendndodhja nuk ka pasur asnjëherë rëndësinë e përmbajtjes!
Sidoqoftë, u përpoqa dhe shpresova se do ta realizonim mbledhjen e sotshme, në pamundësi për ta kryer gjatë ditëve në vazhdim.
Promovimi dhe zhvillimi i Vlorës, bashkë me programet e qeverisë, në të gjitha sferat ku mund të afrohet me zhvillimin e vendeve të rajonit, është programi im i çdo dite. Uroj që të kemi të njëjtin qëllim sepse nuk ka rrugë tjetër për të ndihmuar qytetin!
