Lëvizja Socialiste për Integrim reagon për herë të parë sa i përket zhvillimit të procesit zgjedhor.
Ish-deputetja e LSI, Silva Caka ka dalë në një deklaratë për mediat ku tha se KQZ-ja me raportimet e saj po mashtron qytetarët sa i përket numrit të pjesëmarrjes në votim.
“Sipas monitorimit të kryer nga LSI, pjesëmarrja në qendrat e votimit në 61 bashkitë e vendit nuk e kalon shifrën 10%, ndryshe nga ç’deklaron KQZ. I bëjmë thirrje KQZ të mos vazhdojë në rrugën e mashtrimit, me shifra të manipuluara dhe të pavërteta.
Raportimi nga Komisioni Socialist i Zgjedhjeve me shifra të pakonfirmuara dhe të marra me telefon është një përgjegjësi e rëndë, sepse detyrimi i KQZ është të informojë qytetarët me përqindjen reale në votim me shifra zyrtare dhe të konfirmuara.
Gjatë procesit të votimit ka pasur shkelje të rënda, komisione të reduktuara me 1-3 anëtarë, përgjimi me kamera, votim në grup, pa mjet identifikimi, nga dy-tre herë, persona të shpallur në kërkim, etj”, është shprehur Caka.
