Duke komentuar deklaratën e Metës, se “nuk ul dot palët në tavolinë”, politikani Paskal Milo tha në emisionin “Opinion” se disponon informacione se ditët e fundit, kreu i shtetit ka pasur takime me ambasadorët në Tiranë. Presidenti i ka informuar për pikëpamjet e tij për ngërçin politik.
“Këto janë detajet që unë di”, i tha Milo-Fevziut, duke aluduar se kreu i shtetit është konsultuar me faktorin ndërkombëtar, për qëndrimin e tij. Në një konferencë rajonale në Tiranë, Meta u shpreh se nuk e merr dot përsipër rolin e bashkuesit të dy palëve, që kanë diametralisht qëndrime të kundërta.
“Dëgjoj njerëz të thotë, ‘çfarë bën presidenti i Republikës?’ Presidenti i Republikës nuk mund të ulë në tavolinë 2-3 njerëz që thonë ne nuk ulemi me atë.
Apo dikë tjetër që thotë se 30 qershori do jetë ditë suksesi për demokracinë”, tha presidenti Meta, duke theksuar se roli i tij është të veprojë në bazë të Kushtetutës së Republikës së Shqipërisë.
