Një 24-vjeçar nga Elbasani është arrestuar ditën e sotme, pasi ka thyer urdhrin e shtetrrethimit për të mos qarkulluar në rrugë.
I pyetur nga policia se pse e kishte thyer rregullin, i riu nuk ka dhënë asnjë shpjegim dhe ka kundërshtuar me dhunë punonjësit e policisë.
24-vjeçari është neutralizuar nga policia dhe është shoqëruar në Komisariatin e Policisë Elbasan. Ai akuzohet për veprën penale “Kundërshtimi me dhunë i punonjësit të policisë së rendit publik”.
Njoftimi i Policisë:
Theu rregullin për të qëndruar në banesë, kundërshtoi me dhunë punonjësit e Policisë, por u arrestua në flagrancë.
Në zbatim të masave për parandalimin e përhapjes së COVID-19, shërbimet e Policisë së Komisariatit Elbasan, gjatë patrullimeve për monitorimin e zbatimit të këtyre masave, paraditen e sotme, në lagjen “Vullnetari”, pranë vendit të quajtur “Ura e Zaranikes”, kanë konstatuar një këmbësor që lëvizte me këmbë.
Shërbimet e Policisë i kanë kërkuar arsyen e daljes në rrugë dhe të moszbatimit të orarit kufizues për të qëndruar në banesë, por 24-vjeçari nuk ka dhënë arsye dhe ka kundërshtuar me dhunë punonjësit e Policisë së skuadrës “Shqiponjat”.
Punonjësit e policisë e kanë neutralizuar dhe shoqëruar në Komisariatin e Policisë Elbasan 24-vjeçarin M. LL. Në përfundim të veprime u bë arrestimi në flagrancë i tij, për veprën penale “Kundërshtimi me dhunë i punonjësit të policisë së rendit publik” dhe materialet i kaluan prokurorisë, për veprime të mëtejshme.
