Pandemia e koronavirusit ka prekur shumë shtete në të gjithë botën, duke shënuar edhe mijëra viktima.
Mirëpo një shtet aziatik i cili nuk ndodhet edhe shumë larg Kinës (vendi nga ku nisi përhapja e pandemisë), nuk ka shënuar asnjë viktimë deri më sot nga koronavirusi.
Bëhet fjalë për Kamboxhian, e cila ka mbi 16 milionë banorë, por deri tani vetëm 128 persona kanë rezultuar pozitivë me COVID-19.
Autoritetet vendase kanë arritur ta menaxhojnë në mënyrë të shkëlqyer pandeminë. Kjo falë edhe sensibilizimit të jashtëzakonshëm të banorëve vendas, të cilët i sheh kudo të maskuar dhe duke respektuar protokollin e vendosur nga autoritetet.
Duke marrë parasysh këto rezultate, qeveria vendase ka vendosur të hapë kufijtë për turistët, por me masa tejet të rrepta.
Sipas mediave të huaja, kush futet në Kamboxhia duhet, së pari, të depozitojë një sasi parash prej 3 mijë dollarësh, të cilat do të përdoren për të mbuluar kostot e testeve për COVID-19, por edhe të karantinës.
Në rast se gjithçka do të shkojë mirë, pjesa e mbetur e parave të rikthehen kur largohesh nga ky shtet. Nëse një person do të ndërronte jetë gjatë udhëtimit në Kamboxhia, nga depozita e tij do të zbriteshin 1,500 dollarë për të mbuluar kostot e djegies së trupit.
