Kreu i PD-së, Lulzim Basha, ka vizituar sërish ditën e sotme Thumanën, ku janë regjistruar viktimat nga tërmeti 6.4 ballë.
Kryedemokrati shprehu mirënjohjen e tij ndaj ekipeve të shpëtimit, teksa theksoi se gjendja është e vështirë. Basha shtoi se kërkohet solidaritet maksimal nga të gjithë ata që kanë mundësi të ndihmojnë.
“Dje kam kërkuar shpalljen e gjendjes së jashtëzakonshme. Qeveria e shpalli sot, më mirë vonë se hiç, është momenti kjo gjendje mos mbetet me llafe.
Qindra familje pa strehë kanë nevojë për mbështetje reale, nuk mund të qëndrojnë në çadra, për shkak edhe të të ftohtit. Minimalisht 6 muaj këta banorë duhet strehuar nëpër apartamente. Qeveria duhet të marr masa që asnjë familje mos mbetet në çadër.
Të merren masa për evidentimin e objekteve ne rrezik, dhe të evakuohen njerëzit kudo që ndodhen, që mos kemi më tragjedi të tilla, duhen masa të menjëhershme për të luftuar shokun që ka kapur shoqërinë kryesisht fëmijët”, tha ai.
Tërmeti i fuqishëm që goditi vendin mëngjesin e djeshëm ka shkaktuar një situatë të rëndë, sidomos në zonat e Thumanës dhe Durrësit.
Deri më tani raportohen 31 viktima, ndërsa vijon puna nga ekipet e kërkim-shpëtimit për gërmimin e rrënojave.
