Kreu i qeverisë Edi Rama ka folur për rastin Vangjush Dako dhe përgjimet që u denoncuan nga Partia Demokratike se ai kishte blerë votat duke bashkëpunuar me krimin. Dako nuk është pjesë e listave të PS-së në zgjedhjet e 30 qershorit.
Kryeministri u shpreh se në ato përgjime nuk ka asgjë të vërtetë dhe në asnjë moment nuk është përfshirja e Dakos në ato që akuzohet.
“Nuk më rezulton të ketë dalë ndonjë përgjim për Vangjush Dakon, por disa përgjime kundër sekretit hetimor për një grup kriminal. Dhe mes tyre ka komunikime që nuk tregojnë asgjë për Dakon. Por karshi detyrimit për të informuar opinionin publik, sepse gazetarët nuk do thonë nuk e nxjerr se është sekret hetimor, duhet ndarë informimi nga muhabetet e kafeneve. Ishte një bisedë mes disa horrave që përfshinte në një çorbë Saimir Tahirin, i cili u kërkua të burgoset. Por në 24 orë ishte Antimafia italiane që e hodhi poshtë gjitha”, tha Rama.
Rama u shpreh se si Sajdini në Elbasan dhe Dako në Durrës nuk janë hequr nga lista, por prej kohësh ata kërkonin që të largoheshin nga kjo detyrë, pasi 12 vite janë shumë.
“Zëvendësimi qoftë i Dakos apo Sejdinin në Elbasan, e besoni apo jo është kërkesë e tyre prej kohësh, të lenë mandatet. 12 vjet në krye të dy qyteteve të rëndësishme janë shumë, janë konsum i madh dhe nevoja për të sjellë energji të reja e për të çuar para projektet duhet të sjellë ndryshim.
Në 61 bashki ne sot nuk kemi garë, nuk them se jemi më të mirët, por kush është më i mirë se ne. Kujt t;ia lemë Shkodrën. Bëni një krahasim mes Shkodrës dhe Vlorës. Çfarë kemi bërë në Vlorë për kaq pak kohë dhe çfarë kanë bërë ata në Shkodër për çerek shekulli,” u shpreh Rama.
