Një tjetër video ku duket policia që keqtrajton një të ndaluar, është bërë virale në rrjetet sociale duke marrë komente negative.
Videoja në fjalë është filmuar në Francë, teksa në të shihet momenti kur një polic godet me shkelma dhe vendos këmbën në kokën e një të ndaluari. Ky i fundit raportohet se i kishte kërcënuar me thikë, kur i ishte kërkuar të mbante maskë fytyre në tren.
Pamjet e regjistruara nga pasagjerët e trenit tregonin 42-vjeçarin e arrestuar dhunshëm në stacionin francez të Orleans, pas raportimeve se britaniku ishte i pirë dhe refuzonte të mbante maskë.
Por pasi policët e kishin prangosur dhe shtrirë në platformën e stacionit, një nga oficerët shihet që e godet me shkelma në kokë dhe i shkel mbi të. Një nga pasagjerët dëgjohet që komenton ‘Është si në Shtetet e Bashkuara!’
Me ardhjen e forcave të tjera të policisë dy oficerët raportuan se i ndaluari kishte qenë i dhunshëm prandaj ishte nxjerrë me forcë nga vagoni.
