Ish-deputeti Ervin Salianji ka komentuar situatën e rëndë politike në vend, si dhe foli rreth zgjidhjes së krizës.
Në një intervistë për Fax News, Salianji deklaroi se data 13 tetor ka rënë, por se shumë shpejt do të zhvillohen zgjedhje të lira dhe të ndershme, më një qeveri tranzitore.
“Të vetmet zgjedhje që do të jenë, do të jenë lokale dhe të përgjithshme shumë shpejt. PD e njeh 13 tetorit si datë të ligjshme, por ne kemi kauzën me krijimin e standardeve për zgjedhje të lira dhe të ndershme, me qeveri tranzitore, pa Ramën. Në këtë kuptim e vlerësojmë përpjekjen e presidentit të Republikës, por për shkak të abuzimit të KQZ-së, 13 tetori ka rënë, por zgjedhjet e lira do të jenë shumë shpejt”, tha Salianji.
Sa i takon një dokumenti që ka qarkulluar në media, i cili pretendohet se ka dalë nga zyra e kryetarit të PD-së Lulzim Basha, ish-deputeti deklaroi se nuk i duket si një qëndrim i kryetarit të opozitës.
“Nuk më duket se është një qëndrim i kryetarit, unë i vlerësoj mediat edhe kur janë kritike ndaj opozitës, por pa diskutim letra që ka dalë në publik, tregon disa të vërteta që Edi Rama paguan shpërblen, gazetar dhe media të caktuara, për të deformuar të vërtetën dhe për mos ti shërbyer interesit publik. I vetmi kryeredaktor i mediave është Edi Rama. Nuk besoj se e ka bërë Partia Demokratike. Shoh një hapësirë të pamasë që PD i ka dhënë mediave”, u shpreh ai.
Salianji komentoi edhe qëndrimet kritike të ish-figurave të larta të Partisë Demokratike, ndaj Bashës, duke u shprehur se ato nuk kanë ide, por kanë inate.
“Nuk i di qëllimet, por shoh veprime që kanë kthyer disa personazhe të cilët janë shpërblyer shumë nga demokratët kur kanë qenë në pozicione, tani që nuk janë në pozicione kanë kritika personale, nuk kanë ide, kanë inate. Objektivi kryesor është largimi i Ramës, si një mundësi për ti hapur rrugë ndryshimeve të mëdha”, përfundoi Salianji.
