Ndeshja e planifikuar për t’u luajtur dje në stadiumin “Liri Ballabani” të Burrelit mes Klosit dhe Shkumbinit nuk është zhvilluar. Shkak për këtë është bërë mungesa e stadiumit, teksa Klosi si skuadër pritëse duhet të kishte marrë masat për të pritur peqinasit.
Duke mos pasur një impiant të vetin, Klosi i ka zhvilluar gjithnjë ndeshjet në Burrel, por këtë herë ka ndodhur e kundërta, pasi klubi matjan nuk ka pranuar që ekipi i Kategorisë së Dytë të luajë në fushën e tyre.
Burime jozyrtare i treguan dje gazetës “Panorama Sport”, se ekipi klosjan është drejt shkrirjes për mungesë të një stadiumi. Ndërkohë, pritet që buxhetin për sportin, bashkia ta përdorë për ngritjen e ekipeve të moshave.
Tashmë, Klosi-Shkumbini do të jetë objekt i shqyrtimit nga Komisioni i Disiplinës dhe peqinasit pritet të fitojnë 0-3 në tavolinë.
