Kanë mbetur vetëm 4 ditë nga viti 2017-të dhe punonjësit e naftës në Fier nuk kanë marrë ende pagat e tyre.
Pas disa protestave, rreth 200 punonjës të Uzinës së përpunimit të thellë të naftës në Ballsh janë detyruar të nisin një marshim drejt Tiranës.
Në orët e para të mëngjesit, ata janë mbledhur përpara prefekturës së qarkut Fier, ku i kanë bërë sërish thirrje qeverisë dhe të gjithë instancave përkatëse të marrin masa për të zhbllokuar situatën.
Dhjetëra punonjës janë nisur më pas drejt Tiranës me pankartat “poshtë hajdutët”, dhe “duam paret tona”.
Prej ditësh punonjësit e rafinerisë së Fierit dhe Uzinës së Ballshit, janë ngritur në protesta, deri më sot përpara godinave ku ata punojnë.
Vendimi i marshimit në këmbë vjen pasi zëri i tyre nuk është dëgjuar nga askush.
