Edicioni i radhës së “Kënga Magjike” ka shkaktuar një valë pakënaqësish. Është këngëtari Ardit Çuni, i cili ka shfryrë dufin ndaj Eneda Tarifës, e madje ka bërë publike edhe mesazhet e shkëmbyera me të.
Arditi ishte i ftuar në “Thumb On”, ku tregoi se me Enedën kanë miqësi prej kohësh, ndaj u lëndua shumë. Këngëtari tha më tej se është mërzitur, pasi kurrsesi nuk mund të tolerojë pafytyrësitë.
“Unë me Enedën jemi miq prej kohësh. Ajo që më lëndon më shumë është se unë nuk i toleroj dot pafytyrësitë. Nuk doja të reagoja, por mbrëmë u shokova. Po shikoja “Këngën Magjike” me prindërit, dhe ata e dinë miqësinë time me Enedën.
Kur dha pikët Eneda, kuptova se ajo më ka dhënë 0 pikë. I shkruaj Enedës pasi mori çmimin dhe i kam thënë; e di që po pret një mesazh urimi, por gjithsesi duhet të të them turp që më le me 0 pikë.
Kushdo qofsha unë besoj, e para kënga që kisha, e dyta ne të dy miqësisht nuk ishim për 0 pikë. Unë nuk dua të më votojë askush për miqësi, por në momentin që ti shpërndan këngën time, momentin që ti bën një video dhe thua sa yll kënga, yll ti, yll performanca, kënga ime votohet me 0 pikë.
Ndërkohë që Enedën e kam parë gjithë kohës me Florin, sigurisht mendoja që mund të jetë bërë siç ka ndodhur vitin e kaluar, që pikët t’i kenë bërë bashkë dhe i them ndoshta vendos dhe producenti jot i dashur për pikët e tua. Gjithsesi nuk doja ta bëja publike, por për aq sa të kam vlerësuar unë ty, vendosa të ta dërgoj në privat.
Në orën 3 të mëngjesit shoh një mesazh nga Eneda që më shkruan: Meqë ti ke vendosur ta bësh publike, bëje publike. Në të kundër mesazhet do ia çoj Florit. Se çfarë donte të thoshte Eneda me këtë, unë nuk e di dhe i thashë mos u shqetëso sepse Florit ia kam çuar mesazhin të parit. E kisha detyrë morale ta vija në dijeni dhe Florin për këtë gjë që kishte ndodhur”, shprehet Ardit Çuni.
